नेपालका लागि अमेरिकी राजदूत जेम्स मोरियार्टीले गाउँघरमा हिंसा, धम्की र त्रासको वातावरण अहिलेपनि जारी रहेको बातउँदै तिनले नेपालको शान्ति प्रकृयामा धेरै ठूला समस्या खडा गरेको विचार व्यक्त गरेका छन्।

पूर्वाञ्चलको तीन दिने भ्रमण सकेर बिहीबार राजधानी फर्कनुअघि विराटनगरमा संचारकर्मीहरूसंग बोल्दै राजदूत मोरियार्टीले उनको भ्रमण विवादास्पद भैरहेको भन्ने प्रश्नमा प्रजातान्त्रिक नेपाल र शान्ति बाहेक अमेरिकाको अरु कुनै रुची नरहेको बताएका छन्।

उनले भने, ‘’नेपालमा अमेरिकाको हित (स्वार्थ) कम छ। हाम्रो हित एउटा लोकतान्त्रिक र शान्तिपूर्ण नेपाल मात्रै हो। मेरो सोचाईमा आजकाल नेपालको सबभन्दा महत्वपूर्ण बेला हो। यदि यो प्रकृया सफल भयो भने तपाईको (नेपालीहरूको) भविष्य धेरै राम्रो छ।’’ ‘शान्तिप्रकृया सम्भव’ माओवादी ज्यादति कम नभएको र उनीहरूको प्रतिवद्धता पालना नभएबाट शान्ति प्रकृयामा ठूलो समस्या उत्पन्न भएको बताउँदै राजदूत मोरियार्टीले मधेशी र जनजाति समुदाय आन्दोलित रहेकाले तिनलाई समेत समावेश गरेर अगाडि बढेमा मात्र शान्तिप्रकृया सम्भव हुने बताए। उनले भने, ‘’मलाई अलिकति डर लाग्यो कि अहिलेसम्म तपाईको शान्तिप्रकृयाको समस्या धेरै ठूलो छ किनकि एउटा दलले उसको प्रतिवद्धता पालना गरेको छैन।

त्यसबाहेक आजकाल मधेशी समस्या उठेको छ। अनि मधेशी बाहेक अरु जनजातिहरू पनि असन्तुष्ट छन्।’’ राजदूत मोरियार्टीले अमेरिका भौगोलिक रुपमा नेपाल भन्दा धेरै टाढा रहेकोले नेपालमा उसको रुची छिमेकी भारत र चीनको भन्दा निकै कम रहेको पनि बताए। कार्यकाल सिध्याउन लागेका राजदूत मोरियार्टी विरुद्ध माओवादी निकटस्थ र अन्य दल समर्थकहरूले कालो झण्डा सहित नाराबाजी गरेका थिए।

हाम्रा विराटनगर संवाददाताका अनुसार, होटेल बाहिर मोरियार्टी विरुद्ध नाराबाजी भैरहँदा उनि भने प्रदर्शनकारीहरूलाई नै अभिवादन गर्दै भित्र पसेका थिए।