नेपाल पत्रकार महासंघको केन्द्रीय साधारणसभा तथा आम सञ्चार स्वतन्त्रता राष्ट्रिय सम्मेलन आजदेखि महेन्द्रनगरमा सुरु भएको छ । साधारणसभाको सभामुख सुवास नेम्वाङले उद्घाटन गर्नुभयो । साधारणसभामा सहभागी हुनका लागि देशका विभिन्न ठाउँका करिब १ हजार पत्रकारहरु महेन्द्र नगरमा भेला भएका छन् । सम्मेलनमा स्थानीय कलाकारहरुले सुदुर पश्चिमको ऐतिहासिक देउडा, ससिया र होली नाच प्रदर्शन गरेका थिए । आजदेखि सुरु भएको महासंघको साधारणसभाले महासंघको अहिलेको विधान परिवर्तन गरी समावेशी बनाउने बताइएको छ । साधारणसभा पर्सीसम्म चल्नेछ ।

यसैबीच प्रधानमन्त्री गिरिजाप्रसाद कोइराला, नेकपा एमालेका महासचिव माधवकुमार नेपाल र नेपाली कांग्रेस प्रजातान्त्रिकका सभापति शेरबहादुर देउवाले साधरणसभाको सफलताको कामना गर्नुभएको छ । वहाँहरुले वक्तव्यमार्फत यस्तो कामना व्यक्त गर्नुभएको हो । सन्देशमा निरंकुशतन्त्रको अन्त्य गर्न पत्रकारहरुको महत्वपूर्ण भूमिका रहेको भन्दै त्यो भूमिकाको सम्मान गरिएको छ । उहाँहरुले संविधानसभाको चुनाव सफल बनाउन समेत पत्रकारहरुले उल्लेख्य भूमिकाको अपेक्षा गर्नुभएको छ ।