गैर आवासीय नेपाली संघ दक्षिण कोरियाद्वारा कोरियाको राजधानी सिउलमा आयोजित विशाल भेलालाई सम्बोधन गर्दै एनआरएन अन्तर्राष्ट्रिय समन्वय परिषद्का केन्द्रीय प्रतिनिधि रुद्र शर्माले आगामी ६ महिनाभित्र एनआरएन दक्षिण कोरियाको अधिवेशन बोलाई नयाँ कार्य समिति निर्माण गर्ने र यसको तयारीका लागि सदस्यता र्फम वितरण भइसकेको बताउनु भएको छ ।

सो अवसरमा शर्माले १ सय ८२ दिन विदेशमा बसोवास गरेका कुनै पनि नेपाली एनआरएनको सदस्य रहने बताउँदै कोरियामा रहेका सम्पूर्ण संघ/संस्थासँग भावनात्मक एकता गरी एनआरएन अगाडि बढ्ने बताउनुभयो । उक्त परिचयात्मक अन्तरक्रिया तथा एनआरएन दक्षिण कोरियाको भावी विषयक कार्यक्रममा बोल्दै नेपाल बौद्ध परिवार तथा नेपाली जनसम्पर्क समिति दक्षिण कोरियाका अध्यक्ष नरेन्द्र गुरुङले नेपाल बौद्ध परिवार एनआरएनसँग हातेमालो गर्दै अगाडि बढ्ने बताउँदै शान्तिका अग्रदूत गौतम बुद्धको जन्म भारतमा नभई नेपालमा भएको कुरा दक्षिण कोरियाका जनतालाई प्रष्ट पार्ने कार्य आफ्नो संस्थाले गरेको बताउनु भयो । उहाँले एनआरएन कोरियाले सम्पूर्ण नेपालीहरुबीच लोकप्रिय हुन चाँडो भन्दा चाँडो सदस्यता वितरण गरी आफ्ना गतिविधि सार्वजनिक गर्न आग्रह गर्नुभयो ।

एनआरएन दक्षिण कोरियाका उपाध्यक्ष ध्यान राईको स्वागत भाषणबाट सुरु भएको सो कार्यक्रममा बोल्दै नेपाली सम्पर्क समिति दक्षिण कोरियाका सभापति बमप्रसाद लावतीले एनआरएन कोरिया कोठाभित्र गठन भए पनि आफ्नो संस्था नेपाली सम्पर्क समिति पनि यस संस्थासँग हातेमालो गरी अगाडि बढ्न तयार रहेको बताउँदै एनआरएनले प्रवासी नेपलीको आँसुलाई पुछ्ने कार्य गर्न आग्रह गर्नु भयो । उहाँले नेपालीहरुको दुःखेको घाउमा एनआरएनले मलम दल्नुपर्ने र कोरियामा रहेका सम्पूर्ण ४५ वटा संस्थासंग एनआरएनले भावनात्मक एकता गरी अगाडि बढ्नुपर्ने चर्को आवश्यकता रहेको बताउनु भयो ।

एनआरएनका अर्का उपाध्यक्ष डा. देवी बहादुर बस्नेतले हालसम्मका एनआरएन कोरियाको गतिविधि र भावी कार्यक्रम बारे भिडियो रेकर्ड प्रस्तुत गर्दै एनआरएन के हो ? यसको स्थापना कसरी भयो र यसले के कस्ता कार्यक्रम सञ्चालन गर्दैछ भन्ने बारे जानकारी दिनु भएको सो कार्यक्रममा सन्सिकका अध्यक्ष प्रमोद श्रेष्ठले विद्यार्थीका गतिविधि र एनआरएनको भूमिका बारे प्रष्ट पार्दै एनआरएनले विद्यार्थीहरुलाई पनि समेटेर लैजानपर्नेमा जोड दिनुभयो । उहाँले उच्च शिक्षा हासिल गर्न प्रवासी भूमिमा आएका नेपाली विद्यार्थीहरुलाई एनआरएनले आफ्ना गतिविधिमा प्राथमिकताका साथ सहभागी गराउनु पर्ने बताउनु भयो ।

यसैगरी प्रवासी नेपाली पत्रकार संघका उपाध्यक्ष उत्तम गुरुङले एनआरएन कोरियाले सम्पूर्ण नेपालीहरुलाई एकताबद्ध गरी अगाडि बढेमा प्रवासी नेपाली पत्रकार संघ पनि हातेमालो गरी अगाडि बढ्न चाहेको बताउनुभयो । साथै एनआरएन कोरियाको स्थापना भएको ६ महिना बितिसक्दा पनि कुनै गतिविधि बाहिर नआउनुमा र सदस्यता समेत वितरण नहुनुले एनआरएन कोरिया खोज्दै हिड्नु पर्ने अवस्थामा आज यस्तो कार्यक्रम गरिएकोमा आफु खुशी भएको र आउँदा दिनहरुमा आफ्नो संस्था प्रवासी नेपाली पत्रकार संघले प्रवासी गतिविधिलाई निष्पक्ष र सत्यतथ्य समाचार प्रकाशित गर्दै जाने प्रष्ट पार्नुभयो ।

सो छलफल कार्यक्रममा बोल्दै माइग्रेन्ट ट्रेड युनियनका क्षेत्रीय उपाध्यक्ष कृष्ण आचार्यले एनआरएनले छ हजार नेपाली रहेको कोरियामा नेपालीहरुले भोगिराखेको समस्याको समाधानमा डटेर लाग्नु पर्ने बताउनु भयो । उहाँले विश्वमा ११ लाख नेपालीहरु प्रवासी कामदारको रुपमा रहेकाले एनआरएनले मजदुरलाई समेटेर अगाडि बढ्न सक्नु पर्ने बताउनु भयो । साथै एनआरएन दक्षिण कोरियाका अध्यक्ष के. पी. सिटौलाले एनआरएन कोरियाले छोटो समयमै यतिधेरै महत्वपूर्ण कार्य गरेको बताउँदै चाँडो भन्दा चाँडो साधारण सदस्यता वितरण गरी ५ महिनाभित्र साधारणसभा बोलाई नेतृत्व परिवर्तन गर्न आफू तयार रहेको बताउँदै एनआरएन कोरिया सम्पूर्ण संघ/संस्थासँग भावनात्मक सम्बन्ध कायम गरी अगाडि बढ्न तयार रहेको प्रष्ट पार्नु भयो । साथै उक्त कार्यक्रममा उपस्थित विभिन्न संघ/संस्थाका प्रतिनिधिहरुले एनआरएन कोरियाको गतिविधि, सदस्यता तथा विधानका बारेमा आआफ्नो विचारहरु ब्यक्त गरेका थिए ।