उत्तम गुरुङ
दक्षिण कोरिया

नेपाली प्रवासी पत्रकार संघ दक्षिण कोरियाका सभापति डम्बर सुब्बाको सभापतित्वमा शनिबार कोरियाको राजधानी सिउलमा बसेको तेस्रो पूर्ण बैठकले कार्य समितिलाई पूर्णता दिंदै देशमा हालै सम्पन्न ऐतिहासिक शान्ति सम्झौताको अक्षरशः कार्यान्वयन गर्न माग गर्ने निर्णय गरेको छ।

नेपाल पत्रकार महासंघ केन्द्रीय समितिको बनेपामा महासंघका अध्यक्ष विष्णु निष्ठुरीको अध्यक्षतामा बसेको आठौं बैठकले नेपाली प्रवासी पत्रकार संघ दक्षिण कोरियालाई सम्पर्क समितिको मान्यतालाई अनुमोदन गरेकोमा बैठकले हार्दिक धन्यवाद दिंदै खुसियाली ब्यक्त गरेको छ । दक्षिण कोरियाको राजधानी सिउलस्थित हिमालयन रेष्टुरेण्टमा बसेको बैठकले नेपाली प्रवासी पत्रकार संघ दक्षिण कोरियालाई पूर्णतासमेत दिएको छ । उक्त बैठकले फोटो पत्रकार उत्तम गुरुङलाई संघको उपाध्यक्षमा निर्विरोध चयन गरेको छ भने अन्य दुई सदस्यमा राप्के लामा र पुरु जोशीलाई चयन गरेको छ ।

यसैगरी उक्त बैठकले सल्लाहकारहरुमा एनआरएन-आइसीसीका केन्द्रीय प्रतिनिधि रुद्र शर्मा, नेपाल बौद्ध परिवार तथा नेपाली जनसम्पर्क समिति दक्षिण कोरियाका उपाध्यक्ष नरेन्द्र गुरुङ र नेपाली सम्पर्क समिति दक्षिण कोरियाका सहसचिव सुरेश कुमार लिम्बूलाई चयन गरेको छ ।  यस्तै उक्त बैठकले केही दिन अगाडि सरकार र माओवादीबीच भएको ऐतिहासिक शान्ति सम्झौता अक्षरशः लागू गर्न आग्रह गरेको छ ।

उक्त बैठकपछि संघका सचिव भूपेन्द्र आचार्यद्वारा जारी विज्ञप्ति अनुसार शान्ति सम्झौतालाई सम्झौतामा मात्र सीमित नगरी कार्यान्वयन गर्ने तर्फ सबै तहबाट ध्यान केन्द्रित गरी आम नेपालीको वास्तविक स्थायी शान्तिको चाहना पूरा हुने त्यसतर्फ लाग्नुपर्छ भनिएको छ । साथै स्थायी शान्ति बहालीसँगै पूर्ण प्रेस स्वतन्त्रता, मानव अधिकार र जनताका अधिकारलाई स्थापित गर्ने, संविधानसभामार्फत लोकतान्त्रिक गणतन्त्र स्थापना गर्ने कार्यमा आगामी दिनमा पनि निरन्तर क्रियायाशील रहने प्रतिबद्धता बैठकमा पारित गरेको छ।